Nahimong sentro sa init nga diskusyon sa social media ang resulta sa bag-ohay lang nahuman nga Laga ta Bukidnon 2026 dungan sa nagpadayong selebrasyon sa Kaamulan Festival.
Kini human miani og nagkadaiyang reaksyon gikan sa mga netizens ang pagdaog ni Ross Saguilan Lungayan, ang pambato sa dakbayan sa Valencia, diin gawas sa mga negatibong komento ug pagpakaulaw online, nahimo usab nga isyu ang matud pa gamay nga premyo nga nadawat sa mga mananaog. Base sa mga migawas nga taho, mitala lamang sa ₱5,000 ang nadawat nga premyo, butang nga gi-kwestyon sa kadaghanan gumikan ang maong kompetisyon usa sa mga dagkong kalihukan sa festival.
Sa pakighinabi sa Bombo Radyo Malaybalay ngadto kang Jose Jun Galario, ang consultant ug tigpamaba ni Mayor Azucena Huervas, iyang gipatin-aw nga wala’y mahimo ang lokal nga kagamhanan sa Valencia kabahin sa kantidad sa premyo gumikan pagbuot kini sa kagamhanang probinsyal sa Bukidnon.
Apan isip pagpakita og suporta ug pagdayeg sa dungog nga gidala ni Lungayan sa dakbayan, gibutyag ni Galario nga ang LGU-Valencia na lamang ang mohatag og dugang cash incentives ug pahalipay sa ilang mga pambato.
Gidugang pa ni Galario nga ang maong inisyatiba usa ka paagi aron mapalig-on ang moral sa mga partisipante ug isip pag-ila sa ilang dedikasyon, paningkamot, ug sakripisyo sa tibuok kompetisyon. Kini taliwala sa nasinati nga “online bashing” sa rayna, diin nagpabilin ang hugot nga pagsuporta sa dakbayan sa Valencia sa ilang representante nga malampusong nidepensa sa korona.