Nadakpan sa mga otoridad ang duha ka indibidwal nga giila sa alyas “Dam,” 35-anyos, ug alyas “Jap-Jap,” 33-anyos, atol sa gilusad nga anti-drug operation sa Barangay Poblacion, Kitaotao, Bukidnon niadtong milabay’ng adlaw.
Gilusad ang maong operasyon sa Municipal Drug Enforcement Unit sa Kitaotao Police Station.
Narekober gikan sa mga suspek ang lima ka sachet sa gituohang shabu nga mutimbang og 4.5 gramos, nga adunay Standard Drug Price nga P30,600.
Nakuha usab sa mga pulis ang buy-bust money, cellphone, sling bag, ug usa ka motorsiklo.
Gipasalig sa kapulisan nga padayon ang ilang kampanya batok sa ilegal nga druga ug gihangyo ang publiko nga magpadayon sa pagtaho sa bisan unsang kadudahang kalihukan pinaagi sa 911 o sa pinakaduol nga estasyon sa pulis.