Nagpabuto og warning shots ang militar sa South Korea human nakalapas ang pipila ka sundalo sa North Korea sa Military Demarcation Line (MDL) nga nagbulag sa duha ka nasod.
Sumala sa Joint Chiefs of Staff (JCS) sa South Korea, gipatuman dayon sa ilang militar ang operational protocol dihang namatikdan ang pagtabok sa maong mga sundalo sa sidlakang bahin sa utlanan. Dihadiha usab nga mibalik sa ilang teritoryo ang mga sundalo sa North Korea human madungog ang gipabutong nga mga pagpasidaan.
Bisan pa man niana, gipahayag sa JCS nga posibleng nakalapas lamang ang mga sundalo samtang nagpahigayon og routine patrol sa maong lugar. Kini ang unang natala nga border incident sa demarcation line karong tuiga 2026, diin nagpabilin nga high alert ang militar sa South Korea sa pikas bahin sa ilang utlanan.