Gibarogan sa nasod nga Iran nga magpabilin ubos sa ilang kontrol ang Strait of Hormuz, samtang gihimakak ang pahayag ni US President Donald Trump nga mahimo kining ideklara nga teritoryo sa Estados Unidos.
Sumala kay Iranian Deputy Foreign Minister Kazem Gharibabadi, ang maong estratehikong agianan sa kadagatan pagpanag-iya sa Iran ug ang Tehran ra ang adunay katungod kon kanus-a kini ablihan o sirad-an. Gipasabot usab niini nga ang maong agianan “nagpabilin ug magpabilin nga teritoryo sa Iran.”
Ang maong pahayag maoy tubag sa batikos ni Trump sa usa ka rally sa New York diin giingong mahimo niyang angkonon ang maong dapit. Ang Strait of Hormuz usa ka kritikal nga ruta alang sa pangkalibutanon nga pamatigayon sa lana nga nagdugtong sa Persian Gulf ug Gulf of Oman, diin nagpabilin nga limitado ang biyahe sa mga barko tungod sa padayong tensyon sa Middle East.