Andam na ang House prosecution panel sa umaabot nga impeachment trial batok kang Bise Presidente Sara Duterte, sumala sa tigpamaba sa panel nga si Rep. Zia Alonto Adiong.
Sumala ni Adiong nga naorganisa na ang 11 ka miyembro sa prosecution team ug matag usa adunay nakatagana nga papel aron mas paspas ug mas organisado ang presentasyon sa mga articles of impeachment sa Senado nga molingkod isip impeachment court.
Sa karon, naghulat pa sila sa pormal nga tubag sa kampo sa Bise Presidente, nga gilauman isumite sa Hunyo 1, ug human niini mosunod ang official response sa House prosecutors.
Human sa pagbayloay sa mga dokumento, gilauman nga magtakda ang Senado og pre-trial proceedings diin hisgutan ang mga lagda sa pagdungog, pagpresentar sa ebidensya, ug listahan sa mga testigo sa duha ka kampo.
Gipasiugda usab ni Adiong ang importansya sa husto ug tinuod nga impormasyon, ug gi-awhag ang publiko, media, eskwelahan, ug mga fact-checking groups nga magkigtimbayayong sa pagpakigbatok sa disinformation nga may kalabotan sa impeachment case.
Dugang pa niini nga ang impeachment dili lang isyu sa Kongreso kundili usa ka national accountability process nga angay bantayan sa tibuok katilingban.
Gipunting usab sa House prosecution nga ang mga isyu nga ilaha dayong hisgutan sa Senado naglakip sa confidential funds, liquidation reports, COA findings, cash envelopes, ug giingong mga hulga, nga maoy sentro sa kaso batok sa Bise Presidente.
Sa kinatibuk-an, gipakita sa House prosecution team ang ilang pagpangandam sa legal nga proseso samtang nag-awhag sa publiko nga magpabilin nga mabantayon ug informed sa tinuod nga mga isyu sa impeachment trial.