Gibutyag ni retired Senior Associate Justice Antonio Carpio nga dili na kinahanglan pa ang pag-apil sa lokal nga mga korte sa Pilipinas sa pagsilbi sa arrest warrant nga gi-isyu sa International Criminal Court (ICC) batok kang Senador Ronald “Bato” dela Rosa.
Sumala ni Carpio, ang kaso nga crimes against humanity usa ka krimen batok sa tibuok katawhan, busa ang bisan unsang nasud mahimong adunay hurisdiksiyon niini.
Dugang pa niini, nga ilawom sa Konstitusyon sa Pilipinas, giila ang universally accepted principles sa international law.
Gipunting usab ni Carpio nga ang dili pag-isyu sa Korte Suprema og temporary restraining order (TRO) nagpasabot nga mahimong epektibo ang arrest warrant nga gikan sa ICC.
Dugang pa ni Carpio, ilawom sa Republic Act 9851, ang gobyerno adunay opsyon nga ipatuman ang warrant pinaagi sa pag-aresto o pag-turn over sa akusado ngadto sa ICC, o posibleng ipa-atubang kini sa lokal nga korte.
Kini nga pahayag mitumaw samtang nagpadayon ang argumento sa kampo ni Sen. dela Rosa nga kinahanglan pa og interbensyon sa lokal nga korte aron mahimong balido ang ICC warrant.