Nanawagan ang kanhi presidente sa Integrated Bar of the Philippines (IBP) nga si Atty. Eddie Cuaresma sa publiko, ilabina sa kabatan-onan, nga barugan ang kamatuoran ug hingpit nga batukan ang korapsyon sa nasud.
Sa pakighinabi sa Bombo Radyo Malaybalay, gipahayag ni Cuaresma nga ang korapsyon nagpabilin nga dakong hagit sa Pilipinas tungod sa dunot nga sistema ug ang partisipasyon mismo sa katawhan sa mga ilegal nga buluhaton sama sa vote-buying. Matud niya, kinahanglan nga isulti ang kamatuoran sa hustong forum sama sa Sandiganbayan aron mapanubag ang mga opisyal nga nalambigit sa mga anomaliya.
Gipasiugda usab sa abogado ang iyang kabalaka sa giingong kakulang sa konkretong aksyon batok sa mga alegasyon sa korapsyon. Gihagit ni Cuaresma ang kasamtangang liderato sa nasud nga magpakita og lig-on nga paningkamot sa pagsulbad niini.
Sa katapusan, mipadangat og hagit ang abogado sa tanang mga botante nga magmatngon sa pagpili og lider ug dili magpadala sa haylo sa kwarta panahon sa eleksyon aron hingpit nga maputol ang siklo sa korapsyon nga nag-among-among sa kaugmaon sa nasud.