Gihagit sa kanhi presidente sa Integrated Bar of the Philippines (IBP) nga si Atty. Eddie Cuaresma si House Speaker Martin Romualdez nga pamatud-an sa hustong forum ang iyang pamahayag nga dili siya mahimong “scapegoat” sa mga alegasyon sa korapsyon sa nasud.
Sa pakighinabi sa Bombo Radyo Malaybalay, gipahayag ni Cuaresma nga ang maong depensa ni Romualdez iya lamang personal nga bersyon ug kinahanglan kining ipaubos sa legal nga proseso. Gipunting sa abogado nga angay’ng susihon ang kamatuoran luyo sa mga kontrobersyal nga flood control projects ug ang pag-apruba sa national budget, diin duna’y direktang papel ang mga opisyal sa Kongreso ug Senado.
Matud ni Cuaresma, ang mga dokumento ug pirma sa mga magbabalaod maoy magsilbing lig-on nga ebidensya kon duna ba gayoy kalambigitan sa mga giingong “ghost” ug substandard nga mga proyekto. Nanawagan kini nga dalhon ang maong isyu sa Sandiganbayan aron maputol ang pagduda sa publiko.
Dugang pa sa abogado, ang padayon nga pangurakot sa gobyerno nagsumikad usab sa kahuyang sa sistema ug sa kultura sa vote-buying. Busa, mipadangat kini og hagit sa mga lungsoranon nga magmatngon sa pagpili og lider ug dili magpabaligya sa ilang baruganan aron mahunong na ang siklo sa korapsyon sa Pilipinas.