Gisiguro sa Senegal ang impresibong 5-0 nga kadaugan batok sa Iraq sa ilang panagsangka sa Group I sa 2026 FIFA World Cup nga gipahigayon sa BMO Field sa Toronto, Canada.
Sayo pa lamang sa duwa, giablihan ni Habib Diarra ang opensa sa Senegal pinaagi sa goal sa ika-upat nga minuto.
Gisundan kini ni Ismaïla Sarr, samtang si Pape Gueye nakapuntos og duha ka sunod-sunod ka goal sa ikaduhang bahin sa duwa.
Gitapos ni Iliman Ndiaye ang scoring pinaagi sa ikalimang goal sa ika-82 nga minuto, nga mipasiguro sa dominanteng kadaugan sa Senegal.
Sa laing bahin, opisyal nang na-eliminate ang Iraq human mapakyas sa pagkuha bisan usa ka puntos sa group stage ug nahuman nga adunay goal difference nga minus-11.
Sa laing update, nanamilit na sa FIFA World Cup 2026 ang duha ka higayon nga kampeon nga Uruguay human mapildi sa powerhouse nga Spain, 1-0, ug napalagpot sa torneyo.
Samtang, nagtapos sa tabla ang duwa tali sa Egypt ug Iran sa Seattle Stadium alang sa Group G sa nagpadayon nga FIFA World Cup 2026.