Nagkasumpaki sa emosyon ug baruganan sila Senador Risa Hontiveros ug Senador Pia Cayetano atol sa sesyon sa Senado kagahpong adlawa Mayo 20, kalabot sa nahitabong kagubot ug pagpabuto og pusil sulod sa Senado niadtong Mayo 13.
Gipasiugda ni Hontiveros nga dili angay kalimtan o isalikway ang maong insidente ug kinahanglan adunay klaro ug lig-on nga aksyon aron mapanubag ang mga responsable.
Matud ni Hontiveros nga dili igo nga sa social media ug mga press conference lamang kuhaon ang tibuok hulagway sa nahitabo, ilabi na nga naapektuhan ang dignidad ug kredibilidad sa Senado isip institusyon.
Sa pikas bahin, emosyonal nga mitubag si Senadora Pia Cayetano ug giila ang dakong kahadlok ug trauma nga nasinati sa mga senador, empleyado, ug media personnel atol sa pagpabuot og pusil.
Gipahayag niini nga dili angay isulti nga “murag walay nahitabo” gumikan daghan ang naapektuhan sa insidente ug adunay mga kawani nga naipit sulod sa building atol sa tensyon.
Samtang, gipatin-aw usab ni Hontiveros nga dili niini pasabot nga wala niya gitagaan og pagtagad ang personal nga pagbati sa iyang mga kauban apan gipunting ni Hontiveros ang kakulang sa institusyonal nga aksyon ug ang panginahanglan nga malikayan ang susamang insidente sa umaabot.