Gipadayag ni Palace Press Officer Claire Castro nga posibleng tawagon nga “pugante” o naglikay sa balaod si Senador Ronald dela Rosa human niini biyaan ang protective custody sa Senado niadtong miaging semana.
Kini ang tubag ni Castro human sa pangutana kon mahimo bang isipon nga pugante ang senador kasunod sa pagbasura sa Supreme Court of the Philippines sa iyang gihangyo nga temporary restraining order o TRO.
Gipadayag usab ni Castro nga mao usab kini ang opisyal nga baruganan sa Office of the Solicitor General kalabot sa kahimtang sa maong mambabalaod.
Apan, ang tanang operational matters may kalabotan sa posibleng pagpatuman sa warrant itugyan na sa Department of Justice.
Gipasiugda usab ni Castro nga balido ang warrant of arrest nga gipagawas sa International Criminal Court batok kang dela Rosa.
Nagpagawas og resolusyon ang Korte Suprema ug gibasura ang hangyo alang sa TRO ni Senador Bato dela Rosa.
Matud pa ni Castro, ang tanang interpretasyon ug evaluation kalabot sa desisyon sa Korte Suprema itugyan na ngadto sa DOJ ug kang Justice Secretary Frederick Vida.