Gibarugan si suspended Sergeant-at-Arms Mau Aplasca nga adunay nahitabong pag-atake sa Senado atol sa insidente sa pagpabuto og pusil sa ikaduhang andana sa building niadtong gabii sa Mayo 13.
Matud kang Aplasca, ang gipakita nga CCTV footage sa Department of the Interior and Local Government atol sa press briefing sa Malacañang usa lamang ka “spliced video” aron mosuporta sa naratibong gustong ipakita sa ahensya.
Dugang pa niini nga ilang giandam ang tibuok CCTV footage aron pamatud-an nga dili tinuod ang mga alegasyon batok kanila.
Gipanghimakak usab ni Aplasca ang resulta sa imbestigasyon sa DILG nga tulo ka warning shots ang iyang gipabuto, ug giingong usa lamang ka warning shot ang iyang gihimo.
Gipadayag usab niini nga wala’y koordinasyon gikan sa Government Service Insurance System ngadto sa Senado kalabot sa presensya sa mga operatiba sa National Bureau of Investigation nga nagpahimutang sa GSIS building.
Samtang, gipailalom si Aplasca sa unom ka buwang preventive suspension sa Office of the Ombudsman isip kabahin sa fact-finding investigation sa nahitabong insidente.
Girekomendar usab sa Criminal Investigation and Detection Group nga kasuhan si Aplasca ug duha pa ka miyembro sa OSAA tungod sa giingong paglapas sa balaod sa pagpabuto og armas batok sa mga operatiba sa NBI.
Sa pagkakaron, si Manuel Parlade na ang nagtuman isip Officer-in-Charge sa Office of the Sergeant-at-Arms.
Samtang hangtod karon, wala pa gihapon opisyal nga pamahayag si Senate President Alan Peter Cayetano kalabot sa resulta sa imbestigasyon sa DILG, apan sigon niini nga gihulat pa niya ang tanang resulta sa imbestigasyon nga mogawas.