Nagpatuman og mas hugot nga security measures ang Senado samtang nagkaduol ang deadline sa pagsumite ni Vice President Sara Duterte sa iyang tubag sa Articles of Impeachment.
Sumala sa pahimangno, hangtod alas-7 sa gabii sa Hunyo 1 lamang mahimong makasumite og tubag ang Bise Presidente, personal man, pinaagi sa abogado, o pinaagi sa electronic mail.
Kahinumdmang, pormal nga nahatod kang Duterte ang summons niadtong Mayo 20, duha ka adlaw human nag-convene ang Senado isip impeachment court.
Gilauman nga magsugod ang impeachment trial sa Hulyo 6 diin moatubang si Duterte sa mga reklamong culpable violation of the Constitution, graft and corruption, ug betrayal of public trust.
Tungod sa gilaumang pagdagsa sa media ug mga supporters ug kritiko sa Bise Presidente, nagbutang ang Office of the Senate Secretary og mga lagda alang sa media coverage ug nagtudlo usab og mga lugar diin mahimong magpahigayon og press briefing ang kampo ni Duterte.
Matud sa Senado, tumong sa maong mga lakang nga masiguro ang hapsay, luwas ug episyenteng proseso sa pagsumite sa tubag samtang mahatagan gihapon og igo nga access ang media sa mahinungdanong hitabo.
Nakigkoordinar usab ang National Capital Region Police Office o NCRPO sa Office of the Sergeant-at-Arms aron masiguro ang kahapsay ug seguridad sa palibot sa Senado.
Sulod na sa pipila ka semana, adunay ipahimutang nga mga pulis sa gawas sa building tungod sa mga protesta sa nagkadaiyang grupo nga adunay lain-laing baruganan bahin sa impeachment case ni Duterte ug uban pang mga isyu nga giatubang sa Senado.
Samtang, ubos sa Rules of Procedure on Impeachment Trial, adunay lima ka adlaw ang prosecution panel aron mosumite sa ilang reply human madawat ang tubag sa Bise Presidente.