Napugos nga ihunong sa Swiss International Air Lines ang takeoff sa usa ka eroplano gikan sa Delhi paingon sa Zurich human nagka-problema ang makina niini.
Sumala sa airline, upat ka pasahero ug usa ka crew member ang nasamdan sa maong insidente.
Base sa imbestigasyon sa mga otoridad, usa sa mga makina sa eroplano ang kalit nga midilaab samtang nagpadagan na kini sa runway, hinungdan nga gilayon nga gikansela ang pagbiyahe ug gihimo ang emergency evacuation.
Ang eroplano, usa ka Airbus A330, may sakay nga 228 ka pasahero lakip ang upat ka mga bata ug 13 ka crew members.
Tungod sa insidente, nagdeklara og emergency ang Indira Gandhi International Airport, apan kalaunan nibalik ra usab sa normal ang operasyon sa runway.
Gidala dayon sa ospital ang mga nasamdan, samtang ang crew member nakaangkon og sprained ankle.
Sa karon, nagpadayon ang imbestigasyon sa Swiss International Air Lines pinaagi sa usa ka task force aron mahibal-an ang tinuod nga hinungdan sa problema sa makina.