Pormal nang gipasakahan og kasong plunder ug kalapasan sa Anti-Graft and Corrupt Practices Act sa buhatan sa Ombudsman si Senador Jinggoy Estrada ug DPWH Secretary Manuel Bonoan.
Kini human mikomenda ang Department of Justice (DOJ) Special Prosecution Service nga kasohan ang duha ug uban pang opisyal sa DPWH tungod sa giingong anomalya sa ₱355-milyon nga pundo sa mga flood control project. Kahinumduman nga giakusahan si Estrada ni kanhi DPWH Bulacan assistant district engineer Brice Hernandez nga nidawat og 30% nga kickback.
Gikumpirma ni Assistant Ombudsman Mico Clavano nga walay girekomendang bail bond o pyansa ang mga prosecutor alang sa maong mga kaso sa Sandiganbayan. Kini na ang ikatulong higayon nga nag-atubang og kasong plunder si Estrada, human sa iyang mga kaso niadtong 2001 ug 2014.
Mibarog si Estrada nga duna’y iregularidad ug kakuwang sa due process ang pagpasaka sa kaso. Isip depensa, gigunitan sa senador ang sulat gikan sa Senate Legislative Budget Research and Monitoring Office (LBRMO) nga nagpamatuod nga wala siya’y gihimong budget insertion sa 2025 national budget. Andam usab ang iyang kampo nga mogamit sa tanang legal nga remedyo aron limpyohan ang iyang ngalan.
Sa pagkakaron, gimanduan na sa Ombudsman ang mga akusado sa pagsumite sa ilang counter-affidavit sulod sa 15 ka adlaw, samtang padayon pang gisuwayan sa Bombo Radyo ang pagkuha sa dugang habig sa isyu gikan sa duha ka opisyal.