Gibutyag sa National Bureau of Investigation (NBI) nga ilang dal-on dayon ngadto sa Department of Justice (DOJ) si Senador Ronald “Bato” dela Rosa sa higayon nga malampuson nila kining madakpan.
Matud mismo ni NBI Director Atty. Melvin Matibag, ilang iturn-over ang senador ngadto sa DOJ aron mao na ang mopadayon sa pagproseso sa kaso batok kaniya.
Kini matud pa ang sunod nga lakang sa gobyerno sa pagpatuman sa arrest warrant nga giisyu sa International Criminal Court (ICC) batok kang Dela Rosa. Gipasabot usab ni Matibag nga gitugyan na nila sa Department of Justice ang pagdesisyon kung dal-on dayon ang senador gawas sa nasud padulong sa international tribunal.
Apan sa bahin sa DOJ, nagdumili si Justice Secretary Frederick Vida sa pagkumpirma kung dad-on ba dayon si Dela Rosa ngadto sa The Hague, Netherlands sa oras nga madakpan na kini.
Matud sa kalihim, operational matters ang maong isyu ug dili mahimong ipadayag sa publiko aron dili maapektuhan ang operasyon ug ang tumong nga madala ang senador ngadto sa international tribunal.
Usa ang NBI sa mga ahensya nga gimandoan sa DOJ sa pagpatuman sa warrant batok kang Dela Rosa human ibasura sa Korte Suprema ang hangyo sa senador alang sa interim relief nga unta makapugong sa iyang pagdakop.
Bisan pa niini, giangkon ni Director Matibag nga sa pagkakaron wala pa silay gitakdang timeline kung kanus-a gyud madakpan si Senador Dela Rosa.