Nag-viral ug nahimong global sensation ang usa ka talagsaong albino nga kabaw nga gi-nganlan og “Donald Trump” sa Bangladesh tungod sa iyang blond nga buhok nga giingong pareha sa hinapay ni U.S President Donald Trump.
Ang hapit 700 kilos nga albino buffalo gipadako sa usa ka umahan sa Narayanganj duol sa Dhaka ug nakadani og daghang tawo nga moadto aron mag selfie ug mag video uban niini, ilabi na sa nagkaduol nga Eid al-Adha.
Sumala sa tag-iya nga si Ziauddin Mridha, ang iyang manghod maoy nagngalan sa kabaw tungod sa dagway niini.
Bisan pa sa iyang talagsaong imahe, giingong malumo ug dili agresibo ang maong mananap gawas na lang kung samokon kini.
Talagsaon lang ang albino nga kabaw sa tibuok kalibutan, ug ang kombinasyon sa panagway, kadak-on, ug malumo nga kinaiya niini maoy hinungdan nga nahimo kini og usa sa pinakadakong atraksyon karong tuiga.
Gikinahanglan usab kini og espesyal nga pag-atiman, lakip na ang pagligo og ika-upat nga higayon kada adlaw ug regular nga pagpakaon aron mapreserbar ang kahimsog niini.
Apan, bisan pa sa kasikat niini, gipadayag nga na-deliver na ang kabaw ngadto sa buyer ug gamiton isip halad sa Eid al-Adha 2026, usa ka tradisyon sa Muslim community diin maghalad og hayop isip simbolo sa pagtuo.