Giduso ni Senador Bam Aquino ang pagpagawas sa publiko sa tanang ebidensiyang ipresentar sa impeachment trial ni Bise Presidente Sara Duterte aron mas mahimong bukas ug transparent ang proseso alang sa katawhan.
Sumala ni Aquino, magpasaka siya og mosyon sa unang semana sa pagdungog aron hangyoon nga ipahibalo sa publiko ang tanang ebidensiyang ipresentar sa prosecution ug defense panels.
Matod ni Aquino, importante nga makita ug masusi sa katawhan ang mga ebidensiya aron makaporma sila sa kaugalingong pagtimbang ug dili lang mosalig sa sayop nga impormasyon.
Gipunting usab sa senador nga ang impeachment usa ka seryosong proseso nga gitugot sa Konstitusyon ug dili sayon nga mapahawa ang usa ka piniling opisyal tungod kay gikinahanglan ang boto sa two-thirds sa tanang senator-judges.
Giawhag usab ni Aquino ang publiko nga bantayan ang matag pagdungog sa impeachment trial ug giingon nga gamiton niya ang iyang social media platforms aron madungog ang mga pangutana ug kabalak-an sa katawhan bahin sa kaso.
Sa katapusan, misaad si Aquino nga magpabiling walay pinalabi isip senator-judge ug mobotar lamang base sa mga ebidensiyang ipresentar sa impeachment court.