Nasikop sa kapulisan ang usa ka 47-anyos nga lalaki sa Barangay Bangahan, Pangantucan, Bukidnon, human nakuhaan og mga armas, magasin ug mga bala atol sa pagpatuman sa Search and Seizure Warrant niadtong milaby’ng adlaw.
Ang nadakpan, nga giila lamang sa alyas nga “Padung,” nadakpan sa hiniusang operasyon sa Provincial Intelligence Unit sa Bukidnon Police Provincial Office (PPO), Pangantucan Municipal Police Station, ug uban pang yunit sa Bukidnon PNP. Gipatuman sa mga otoridad ang Search and Seizure Warrant tungod sa giingong paglapas sa Republic Act 10591 o ang Comprehensive Firearms and Ammunition Regulation Act.
Atol sa operasyon, narekober gikan sa pinuy-anan sa suspek ang usa ka M16A1 rifle, daghang magasin alang sa M16 ug caliber .45 nga armas, ingon man gatusan ka mga bala sa 5.56mm, 7.62mm, ug caliber .45.
Sa pagkakaron, anaa sa kustodiya sa Pangantucan Municipal Police Station ang suspek, samtang gitipigan sa Provincial Intelligence Unit ang tanang nakumpiskang ebidensya aron ipaubos sa ballistic examination.
Giandam na sa mga otoridad ang angayng kaso batok sa suspek tungod sa giingong paglapas sa Republic Act 10591.