Nagtuo si Pangulong Ferdinand Marcos Jr. nga mas mahimong klaro ug mas sayon ang dagan sa impeachment trial kung personal nga motambong si Bise Presidente Sara Duterte sa impeachment court sa Senado.
Matod sa Pangulo, mas maayo kung ang akusado mismo ang motubag sa mga alegasyon kaysa ipaagi lamang kini sa iyang mga abogado, bisan pa og personal lamang niya kining opinyon ug dili legal nga tambag.
Dugang pa ni Marcos, kung siya ang anaa sa maong sitwasyon, mopili siya nga personal nga moatubang ug motubag sa mga akusasyon bisan pa og tambagan siya sa iyang mga abogado nga dili motambong.
Kahinumdoman nga gimando sa impeachment court si Duterte nga motambong sa pagdungog karong Hulyo 6, personal man o pinaagi sa iyang legal counsel.
Sa bahin sa depensa, sigon sa kampo ni Duterte nga andam siyang moatubang sa impeachment court kung kini gikinahanglan ug irekomendar sa ilang legal team.
Nag-atubang si Duterte sa mga alegasyon nga naglakip sa giingong sayop nga paggamit sa confidential funds, un-explained wealth, panuhol, ug grave threats, nga iyang gihimakak ug gitawag nga usa ka “fishing expedition” ang mga imbestigasyon sa Kamara.