Wala mahimuot ang sektor sa mga mamumuo ug pipila ka legal nga ekperto sa gibutyag nga performance sa gobyerno ug sa gihimong State of the Nation Address (SONA) sa Presidente Ferdinand Marcos Jr. Gihatagan kini nila og gradong tres (3) ni Nick Borja, usa ka consultant tungod sa kapakyasan niini nga ilakip sa prayoridad ang tinuod nga usbaw sa suholan ug ang pagsumpo sa korapsyon sa gobyerno ug sa Kongreso.
Gipadayag ni Borja,, nga angay na nga i-dissolve o wagtangon ang Regional Tripartite Wages and Productivity Board (RTWPB) tungod sa dili patas nga suholan sa mga rehiyon, sama sa nahitabo sa Bukidnon diin ₱85 lamang ang gihatag nga umento ug anaa sa ₱500 ang minimum nga suweldo, nga layo ra kaayo sa hiniusang gipangayo sa mga mamumuo nga ₱1,000 ngadto sa ₱1,200 nga across-the-board wage increase tungod sa padayon nga pagsaka sa presyo sa mga palaliton.
Sa pikas bahin gisaway sa usab sa usa ka legal expert ang (SONA) sa presidente, ilabi na ang giingong kakulang sa klarong pamaagi o follow-through sa kampanya niini batok sa kurapsyon.
Matud ni Atty. Oscar S. Moreno, propesor sa balaod ug corporate lawyer nga bisan pa man og gipahayag sa Presidente nga “Let us end corruption now” ug ang tinguha niini nga wagtangon ang maong sistema, kulang gihapon kini sa lig-on nga pamaagi o mekanismo kon unsaon kini pagkab-ot.
Gumikan niini, gihagit usab a abogado ang publiko ug ang mga lokal nga panggamhanan sa Bukidnon, Misamis Oriental, Cagayan de Oro, ug uban pang dapit nga dili lang basta magsalig sa nasyonal nga kagamhanan.
Sumala pa niya, kinahanglan nga magbinantayon ug mag-amping ang lokal nga komunidad, ug dili usab angayang mag-agad o magsalig sa hingpit sa mga direktiba gikan sa taas.