Nakakuha ang Pilipinas og mokabat sa $3.4 bilyon dolyar (o hapit ₱210 bilyon pesos) nga mga investment pledges o saad sa pamuhunan gikan sa mga dagkong kompanya sa Japan.
Nahitabo kini atol sa usa ka high-level nga roundtable meeting tali ni Presidente Ferdinand Marcos Jr. ug sa mga lider sa dagkong negosyo ug institusyong pinansyal didto sa Tokyo, Japan. Sumala sa Presidential Communications Office (PCO), ang maong mga pundo gilauman nga makatabang sa pagpalambo sa lokal nga industriya, pag-upgrade sa imprastraktura sa turismo, ug labaw sa tanan, makahatag og liboan ka de-kalidad nga trabaho alang sa mga Pilipino.
Giila ni Presidente Marcos ang dakong kontribusyon sa mga iladong kompanya sa Japan nga dugay nang naglihok sa Pilipinas sama sa Toyota, Mitsubishi, Panasonic, ug uban pa. Matod sa presidente, ang maong lakang nagpakita sa lig-on nga pagsalig sa mga Hapon sa ekonomiya sa nasod, ug iyang gipasalig nga padayong usbon ug modernohon sa gobyerno ang mga institusyon aron mas sayon ug hamugaway ang pagnegosyo sa Pilipinas.