Nasayran sa inisyal nga imbestigasyon nga ang 9mm nga pusil nga gigamit sa suspek sa pagpamusil sa Banga National High School nakuha gikan sa vault sa iyang amahan, nga empleyado sa DepEd Region 12 ug nagtudlo usab og gun safety.
Samtang nagsaad og dinaliang tabang si House Senior Deputy Speaker Dinand Hernandez alang sa mga biktima ug mga pamilya nga naapektuhan sa maong insidente sa South Cotabato.
Sumala ni Hernandez nga gimandoan na niya ang iyang mga staff nga motabang sa mga biktima nga karon nagpaospital pa.
Mipauli usab si Hernandez sa Mindanao uban kang Education Secretary Sonny Angara aron bisitahan ang maong eskwelahan ug ang mga pamilya sa mga biktima.
Gipunting sa mambabalaud ang kamahinungdanon sa pagpalig-on sa seguridad sa mga eskwelahan, pagdugang sa mental health support alang sa mga estudyante, ug paglikay sa pagpakaylap sa dili pa kumpirmadong impormasyon samtang nagpadayon ang imbestigasyon.