Gihagit sa House Deputy Speaker nga si Representative Janet Garin ang kampo sa depensa ni Vice President Sara Duterte nga gamiton ang ilang mga saksi aron matubag ang mga pangutana kalabot sa mga alegasyon sa impeachment complaint, ilabina ang dagkong transaksiyon sa kuwarta ug wala mapatin-aw nga bahandi.
Matud ni Garin, importante nga mapadayag sa mga saksi ang tinubdan ug agi sa kuwarta aron matubag ang mga isyung gipasiugda sa prosekusyon, lakip ang gikatahong P4.4 bilyones nga aggregate transactions ug posibleng conflict of interest.
Gipadayag usab ni Garin nga responsibilidad sa prosekusyon ang pagpresentar sa mga ebidensiya, samtang gihatagan usab og higayon ang kampo sa bise presidente nga mosupak ug motubag sa mga alegasyon pinaagi sa ilang kaugalingong mga ebidensiya.
Dugang pa sa kongresista, kon mapakyas ang depensa sa pagpresentar og mga ebidensiyang makatubag sa mga pangutana, mahimo lamang kining makapalangan sa proseso ug makalikay sa pagpanubag.