Gikuwestyon sa prosecution ang pagpanag-iya ug kalambigitan ni Vice President Sara Duterte sa pipila ka kompanya, lakip ang kalainan sa mga ngalan ug impormasyon sa corporate records ug ubang dokumento.
Sumala kang prosecution spokesperson Representative Zia Alonto Adiong, kinahanglan ipatin-aw kung asa gikan ang legal nga income nga nakapalambo sa net worth ni VP Sara, ilabina human giingong 13 sa 18 ka kompanya nga nalambigit kaniya walay nadeklarang dividend o income base sa SEC records. Â
Matod ni Adiong, ilang gitan-aw kini isip posibleng paglapas sa constitutional restrictions sa negosyo ug financial interests sa mga opisyal sa gobyerno.
Samtang, gikuwestyon ni impeachment advisor ug prosecution spokesperson Robert Ace Barbers ang papel sa negosyanteng si Jaime T. Cruz sa mga kompanyang konektado kang VP Sara.
Matod ni Barbers, kinahanglan pa nga masusi kung si Cruz ba usa lamang ka trustee o posibleng dummy nga nagtago sa tinuod nga tag-iya.
Dugang pa ni Barbers nga kung mapamatud-an nga dummy si Cruz aron itago ang tinuod nga tag-iya, mahimo kining adunay kalambigitan sa posibleng paglapas sa Anti-Dummy Law.