Nagpadayon ang paghatag og water ration sa Prime Water ngadto sa mga residente sa Greenfields Subdivision human makasinati og kakulang sa suplay sa tubig sa miaging mga adlaw.
Sumala kang Gavelino Aspe Jr., residente sa maong lugar, adunay skedyul ang water tanker nga gikatakdang maghatag og rasyon matag alas nuebe sa buntag human sila nakig-coordinate aron ma-clear ang mga agianan sa mga trak.
Matod ni Aspe, adunay mga block nga naabtan sa rasyon apan adunay usab wala naapil tungod sa kakulang sa oras ug usa lamang ka tanker ang nag-operate sa maong lugar.
Dugang pa niini, nga nakita niya ang paglihok sa tanker hangtod sa hapon, nga nagpakita og gamayng kausaban sa paghatag og suplay.Â
Gipasabot sa Prime Water nga magpadayon ang water rationing samtang wala pa ma-permanente nga masulbad ang problema sa regular nga agas sa tubig sa subdivision.
Samtang, gipahinumdoman ang mga residente nga ang tubig nga gihatag pinaagi sa tanker gituyo lamang alang sa panglimpyo, paglaba, ug pagkaligo.
Wala kini girekomendar nga imnon tungod kay dili kini giila nga potable water.Â