Adunay nay person of interest ang kapulisan sa kaso sa pagpamusil patay sa usa ka 52-anyos nga lalaki sa Purok 4, Barangay Sinuda, Kitaotao, Bukidnon.
Sumala kang PMaj. Jose Regner M. Sevilleno, Chief of Police sa Kitaotao Municipal Police Station, nakatabang sa pag-ila sa posibleng suspek ang mga impormasyon nga nakuha gikan sa pamilya ug mga nakasaksi sa insidente.
Ang biktima nailhan nga si Cesario Katihuyan, 52 anyos, residente sa Barangay Sinuda, Kitaotao.
Kauban niya sa motorsiklo ang iyang asawa nga si Jovelyn Katihuyan, 32 anyos, isip backrider, samtang nagpadulong unta sila sa Kibawe, Bukidnon.
Apan sa wala damhang higayon, gipusil sila sa wala mailhing armado.
Naigo si Cesario sa kilid ug dughan ug gidala sa German Doctors Hospital sa Don Carlos, apan gideklarar nga dead on arrival sa doktor.
Samtang ang iyang asawa naigo usab sa bala ug padayon nga gi-monitor ang iyang kahimtang.Â
Gipadayag usab sa kapulisan nga dili kini ang unang insidente nga nalambigit si Katihuyan sa pagpamusil.
Giingong tulo na ka higayon siyang nahimong target sa susamang pag-atake, lakip ang una sa Kibawe ug usa pa ka insidente niadtong Pebrero diin nakaangkon siya og samad pinusilan.
Padayon karon ang imbestigasyon sa kapulisan aron mahibal-an ang motibo ug mapanubag ang responsable sa maong krimen.