Gilauman ang laing hugna sa rollback o pagkunhod sa presyo sa petrolyo sa sunod semana human miusos ang presyo sa mga produktong lana sa ika-3 nga adlaw sa trading sa world market. Posible usab nga manaog ang retail price sa LPG.
Sa ikatulong adlaw sa trading, miusos ang presyo sa mosunod nga kantidad sa tibuok kalibutan:
- Diesel: Paubos og Php 0.70 matag litro
- Gasolina: Paubos og Php 0.30 matag litro
- Kerosene: Paubos og Php 0.60 matag litro
Hinuon, giklaro nga duna pa’y nahabiling duha ka adlaw sa trading nga pwedeng makapausab, makadugang, o makawala sa maong rollback. Matud ni Jetti Petroleum president Leo Bellas, duna’y potensyal nga rollback apan dili kini ingon ka dako sa nahitabong dako nga price cut niadtong miaging Martes.
Samtang didto sa Amerika, nimando si US President Donald Trump og imbestigasyon sa mga oil firm tungod kay hinay matod pa ang pagbaba sa presyo sa mga gasolinahan kompara sa world market. Apan alang kang Department of Energy (DOE) Secretary Sharon Garin, dili kinahanglan nga maghimo og susamang imbestigasyon ang Pilipinas tungod kay sulod sa duha ka bulan, ang gipatuman nga presyo dinhi sa nasod nagsalamin ug saktong nagsubay gyud sa lihok sa international market.