Gipadayag sa Department of Energy (DOE) nga imposible na nga mobalik sa P60 kada litro ang presyo sa krudo ug petrolyo tungod sa epekto sa gubat sa Middle East.
Sumala kang Energy Secretary Sharon Garin, nga ang hinungdan niini ang mga structural damages nga nahitabo sa rehiyon, lakip na ang kadaot sa mga oil-related facilities.
Gipasabot usab niini nga wala pa’y kasiguruhan kung kanus-a matapos ang gubat ug kung unsa kadugay ang pag-ayo sa mga nadaot nga imprastruktura.
Matud pa ni Garin, kung duha ka semana lamang unta ang kagubot, posible pa nga mobalik sa ubos nga presyo ang lana.
Apan tungod kay milabay na ang pipila ka semana, dili na dali ang pagkunhod sa presyo niini.
Sa pikas bahin, gisaad sa kalihim nga magpadayon ang gobyerno sa paghatag og fuel subsidy alang sa mga drayber nga apektado sa taas nga presyo sa petrolyo.
Dugang pa niini, nga adunay uban pang programa nga ipatuman aron maminusan ang epekto niini sa mga motorista, lakip ang paghatag og diskwento alang sa mga jeepney driver sulod sa tulo hangtod upat ka bulan.