Nagpahimangno ang Department of Agriculture (DA) nga posibleng mosaka ang presyo sa bugas ngadto sa P60 hangtod P62 matag kilo sa dili pa matapos ang bulan sa Septyembre.
Sumala ni DA Assistant Secretary Arnel De Mesa, kini nga projection nag-agad sa kasamtangang lihok sa presyo sa bugas sa merkado ug sa nagpadayong hagit sa suplay. Gipasabot sa ahensya nga ang pagsaka sa presyo sa bugas sa world market ug ang epekto sa El Niño sa lokal nga produksyon maoy pipila sa mga hinungdan niining posibleng umento.
Bisan pa man niini, gipasalig sa DA nga aduna silay gihimo nga mga lakang aron masiguro nga magpabiling stable ang suplay sa nasod. Lakip sa ginalantaw sa gobyerno mao ang pagpaabot sa ani sa mga mag-uuma karong mosunod nga mga bulan aron matabangan ang pagpakunhod sa presyo.
Nanawagan usab ang ahensya sa mga konsumidor nga magmabinantayon, samtang padayon silang nakig-alayon sa mga importer ug lokal nga negosyante aron mapagaan ang epekto niini sa katawhan.