Giuyog sa kusog nga magnitude 7.1 nga linog ang Kumamoto Prefecture ug kasikbit nga mga dapit sa isla sa Kyushu sa Japan, diin dali nga nagpagawas og tsunami alert ang mga awtoridad.
Sumala sa Japan Meteorological Agency (JMA), posibleng moabot sa usa ka metro ang gihabogon sa mga alon sa baybayon, hinungdan nga gipahimangnoan ang mga residente nga magbalhin sa luwas nga dapit ug mag-amping sa mga posibleng aftershocks.
Tungod sa kusog nga pag-uyog, gibana-banang 40,000 ka panimalay ang nawad-an og suplay sa kuryente, samtang gipahunong usab ang operasyon sa mga bullet train didto sa Kyushu.
Samtang, gipahibalo sa PHIVOLCS nga walay hulga sa tsunami sa Pilipinas gikan sa maong linog, samtang padayon ang gihimong pag-inspeksyon sa Japan kon duna ba’y mga naangol o danyos sa mga struktura.