Posibleng moubos ang plete sa eroplano sa unang tunga sa Hulyo human gipaubos sa Civil Aeronautics Board (CAB) ang fuel surcharge ngadto sa Level 9, ang pinakagamay nga lebel sukad misaka ang presyo sa lana tungod sa tensyon sa Middle East.
Ubos sa bag-ong fuel surcharge, ang dugang bayranan sa domestic flights mokabat na lang sa ₱287 hangtod ₱839, samtang sa international flights mahimong ₱947.30 hangtod ₱7,044.27, nga mas ubos itandi sa miaging lebel.
Sumala sa CAB, ang pagkunhod sa fuel surcharge resulta sa pag-ubos sa presyo sa jet fuel sa kalibutan, nga gituohang naapektuhan sa pagkunhod sa tensyon tali sa Estados Unidos ug Iran ug sa mga paningkamot nga maablihan pag-usab ang Strait of Hormuz, usa sa labing importanteng agianan sa suplay sa lana sa kalibutan.