Gipadayag sa National Bureau of Investigation (NBI) nga posibleng naay mga bag-ong “arrest warrant” nga ipagawas ang International Criminal Court (ICC) batok sa pipila ka mga indibidwal.
Sumala ni NBI Director Atty. Melvin Matibag, adunay ilang nadawat nga impormasyon nga posible pa nga adunay dugang nga mga indibidwal maisyuhan og warrant gikan sa ICC.
Bisan pa niini, gipasalig sa NBI nga andam sila sa pagpatuman kung kini mahitabo, ug nakahimo na sila og mga protocol sa hustong proseso sa pagsilbi sa arrest warrant aron masiguro nga walay mapaboran bisan kinsa.
Sa karon, nagatutok ang ahensya sa pag-implementar sa warrant batok kang Senador Ronald “Bato” dela Rosa nga gi-utos sa Department of Justice nga ipatuman sa NBI.
Gidugang usab nga lakip sa giila nga co-perpetrators sa kaso ni kanhi Pangulong Rodrigo Duterte sa ICC ang pipila ka opisyal sama nila Sen. Bong Go, ex-DOJ Sec. Vitallano Aguirre II, ug ex-PNP Chief Oscar Albayalde.