Gikabalak-an s probinsyal nga pagamhanan sa Bukidnon ang nagkahuyang nga kultura sa mga kaigsuonang lumad kon Indigenous Peoples (IP).
Gipasabot ni Bukidnon Provincial Governor Rogelio Neil P. Roque nga dako nga trabahuon ug usa ka dakong hagit alang sa liderato sa mga tribu ang pagpreserba sa kultura tungod kay nagkagamay na lamang ang nahibiling “100% IP” nga nagsubay ug nagpraktis sa tiunay nga tradisyon sa probinsya.
Matud sa gobernador, kung dili kini matubag sulod sa 20 ngadto sa 30 ka tuig, posibleng mawala na ang maong mga bililhong kasaysayan sa tibuok probinsya.
Tungod niini, gipasalig sa probinsyal nga kagamhanan ang usa ka hugot nga saad nga suporta ngadto sa komunidad sa Indigenous Peoples (IP) pinaagi sa pagtuon sa mga dinalian nga lakang sama sa pag-ila, pag-plastar, ug pag-dokumento sa mga butang nga giisip nga sagrado sa tribu aron kini magsilbing giya ug daling mapasa ngadto sa sunod nga mga henerasyon.
Kini nga deklarasyon gihimo sa gobernador human kini mitambong sa General Monthly Meeting sa Provincial, City, ug Municipal Indigenous Peoples Mandatory Representatives (IPMRs) kagahapon, Mayo 22, 2026, nga gipahigayon didto sa Provincial IP Tulogan, Kaamulan Park, Malaybalay City.