Nagmugna pag-usab og kasaysayan ang Pinay tennis star Alexandra “Alex” Eala, human gi-detroned o nailog ang korona sa kasamtangang Wimbledon champion ug World No. 3 nga si Iga Świątek sa Poland pinaagi sa 7-6 (11-9), 6-2 nga kadaugan sa ikatulong hugna sa 2026 Wimbledon Championships.
Tungod sa maong kadaugan, nahimong unang Filipina sa Open Era nga nakaabot sa Round of 16 o fourth round is Eala sa usa ka Grand Slam tournament. Ang maong kalampusan giisip nga usa na usab ka labing dakong milestone alang sa Philippine tennis.
Mibutho sa emosyon si Eala human sa makasaysayang kadaugan batok sa usa sa labing kusgan nga magdudula sa kalibotan.
Kini usab ang ikaduhang higayon nga iyang napildi si Świątek, human una niya kining mapildi sa Miami Open niadtong 2025.
Ang kadaugan batok kang Świątek mao na ang ikapito nga higayon nga napildi ni Eala ang usa ka Top 10 player sa Women’s Tennis Association (WTA), diin nagpakita sa iyang padayon nga pagsaka isip usa sa mga nag-unang batan-ong bituon sa internasyonal nga tennis.