Gihulagway sa usa ka Pinay international news correspondent ang subsob nga kadaot ug kalisod nga giatubang karon sa Nepal human miabot na sa kapin 900 ka patayng lawas ang narekober ug kapin 4,200 pa ang nagpabilin nga nawala tungod sa dakong flash flood.
Sa pakighinabi sa Bombo Radyo Malaybalay, gipadayag ni Hope Joyce Degayo Sunwar nga bisan wala sila direktang nabaha sa iyang nahimutangan sa Tanahun, nakaabot sa ilang dapit pinaagi sa Narayani River ang mga bangkay nga gianod gikan sa hilit nga dapit sa Rasuwa.
Tungod niini, gibati sa mga residente ang dakong kabalaka sa posibleng krisis sa panglawas o pagkaylap sa sakit gikan sa mga patayng lawas nga nagpabiling natabunan sa lapok.
Gidugang ni Sunwar nga naguba ang mga nag-unang dalan ug tulay tungod sa mga landslide, hinungdan nga mga helicopter na ang gigamit aron makapaabot og pagkaon, sinina, ug batakang suplay ngadto sa mga isolated nga dapit sa Rasuwa ug Trisuli.
Tungod sa maong trahedya, nanawagan siya og pag-ampo ug suporta gikan sa mga Pilipino aron makatabang sa pagbangon sa nasod sa Nepal.