WORLD / INTERNATIONAL — Gilusad sa kapolisan sa Switzerland ang usa ka dakong manhunt operation batok sa wala pa mailhing armado nga nagpaulan og bala sa usa ka rave party sa lungsod sa Aarau, diin usa ka babaye ang namatay ug lima pa ang nasugatan.
Nahitabo ang pagpamusil taliwala sa kapin 3,500 ka tawo sa maong techno party, diin nag-iyahay sa pagpanagan ug pagtago ang mga nitambong dihang nadungog ang sunod-sunod nga boto sa armas. Kumpirmado sa mga awtoridad nga ang namatay mao ang usa ka 22-anyos nga Italian national, samtang padayong gitambalan sa ospital ang lima ka naangol.
Nagpadayon ang imbestigasyon sa kapolisan human nakaplagan sa dapit ang mga basyo sa bala gikan sa duha ka managlahing kalibre sa armas sama sa assault rifle ug submachine gun. Gisusi karon sa mga awtoridad ang tatlo ka anggulo: kon terorismo ba kini, mass shooting, o usa ka ordinariyong krimen nga wala pa matino ang motibo.