Napakyas ang Philippine Men’s National Football Team sa ilang tinguha nga makabalik sa AFC Asian Cup human sila makakuha lang og 1-1 nga baraha batok sa Tajikistan sa ilang katapusang qualifying match niadtong Martes sa gabii (Marso 31, 2026).
Gipahigayon ang maong krusyal nga dula sa Hisor Central Stadium sa Dushanbe, diin nagkinahanglan og daku nga daog ang Pilipinas aron maka-abante.
Sayo nga nakapuntos ang Pilipinas pinaagi sa goal ni Raphael Obermair sa ika-19 nga minuto sa dula, human niya madawat ang cross gikan ni Randy Schneider. Apan wala magdugay, nakatabla ang Tajikistan sa ika-40 nga minuto pinaagi sa goal ni Shereddin Boboev.
Bisan pa man sa paningkamot sa mga Pinoy players sa ikaduhang bahin sa dula, lakip na ang mga higayon nila ni Jesper Nyholm ug Jarvey Gayoso sa himatyon nga mga minuto, wala na mausab ang iskor hangtod sa pagkapuso sa pito.
Tungod sa maong tabla, parehong nakuha sa duha ka team ang 14 puntos sa Group A, apan ang Tajikistan ang nideklarang group winner ug maoy mo-abante sa 2027 Asian Cup tungod sa mas daku nga goal difference.
Human niini, ibalhin sa Pilipinas ang ilang pokus sa pagpangandam alang sa ASEAN Hyundai Cup 2026 nga ipahigayon karong Hulyo hangtod Agosto.