Mibisita sa Pilipinas ang professional pickleball player ug world number two nga si Anna Bright atol sa duha ka adlaw nga pagbisita niini sa Manila niadtong Oktubre 26 ug 27.
Mainiton kini gisugat sa mga fans sa SM Mall of Asia Music Hall niadtong Martes, diin nakigdula usab sa pipila ka lokal nga mga mahiligon sa pickleball.
Gipahayag ni Bright nga dako ang iyang pagdayeg sa komunidad sa pickleball sa Pilipinas.
Matud pa niini, adunay dakong potensyal ang maong dula sa nasud tungod sa nagkadaghan nga pickleball courts ug sa nag-uswag nga interes sa publiko, dili lamang sa Pilipinas kondili sa tibuok Asya.
Kabahin usab sa iyang pagbisita ang pagpangandam sa Pilipinas isip host sa unang PPA Asia Tour events sa sunod tuig.
Gikatakdang ipahigayon ang PPA 125 sa Enero 14 hangtod 18, 2027, ug ang PPA 500 Manila Open sa Pebrero 25 hangtod 28, 2027 sa Pasig City.
Samtang, sumala ni sports executive ug kanhi Philippine Sports Commission chairman Dickie Bachmann, usa kini ka maayong oportunidad aron mas mapaduol ang international pickleball competitions sa mga lokal nga magdudula, nga kaniadto kinahanglan pang mobiyahe sa gawas sa nasud aron makasalmot sa mga kompetisyon.