Gi-activate o gipaandar na sa Philippine Red Cross (PRC) ang ilang disaster monitoring and emergency response network human sa kalit nga pagbuto sa Bulkang Kanlaon niadtong Huwebes sa buntag, Hulyo 9. Matod sa PRC, samtang walay natala nga pag-ulan sa abo o ashfall sa Negros Occidental, nakasinati hinuon og ulan nga adunay sagol nga abo ang Canlaon City sa Negros Oriental.
Sa usa ka opisyal nga pamahayag, gipahibalo ni PRC Chairman ug CEO Richard Gordon nga naka-standby na ang ilang mga rescue fleet, gipalihok na ang ilang volunteer network, ug gisusi na usab ang mga dapit nga naigo sa ashfall aron maprotektahan ang mga pamilya ug masiguro nga andam ang mga relief pack.
Hinuon, giklaro sa PRC nga nagpabiling maagian ang mga nag-unang dalan ug tulay, ug wala pa’y giablihan nga aktibong evacuation center sa pagkakaron. Bisan pa niini, nagpabiling nakataas ang alerto sa PRC ug padayon ang ilang mga local chapter ug volunteers sa pag-monitor sa sitwasyon sa mga apektadong dapit aron daling makatubag kung gikinahanglan.