Gipahayag ni Department of Social Welfare and Development (DSWD) Secretary Rex Gatchalian nga hugot nilang gimonitor ang sitwasyon sa mga residenteng apektado sa pag-alburoto sa Bulkang Kanlaon sa Negros Island. Tungod sa maong hitabo, gimandoan na sa kalihim ang ilang mga field office nga paspason ang pag-andam ug paghatag sa mga hinabang.
Sa pagkakaron, gipasalig sa DSWD nga duna sila’y igong suplay sa Family Food Packs (FFPs) nga naka-preposition na sa Visayas region aron daling mahatag sa mga apektadong lumulupyo. Lakip niini ang kapin 192,000 ka food packs nga andam na sa Negros Island Region, ug dugang 100,000 ka FFPs sa kasilinganang Region 7 (Central Visayas).
Gawas sa pagkaon, nag-andam usab ang ahensya og dugang mga family tent ug uban pang non-food items aron masiguro nga hapsay ug komportable ang kahimtang sa mga bakwit sa mga evacuation center. Matod pa ni Gatchalian, andam magpadala og dugang tabang ang ilang central office kung gikinahanglan, ilabi na kung molungtad pa ang pag-ulbo sa bulkan ug mosamot kalapad ang epekto niini sa panginabuhian sa mga tawo.