Giklaro sa Senado nga pulos administratibong butang ug house rules lamang ang rason sa kalit nga pagbisita ni OVP Chief of Staff Atty. Zuleika Lopez sa maong buhatan taliwala sa nagpadayong impeachment trial batok kang Bise Presidente Sara Duterte.
Matud ni Senate Secretary Renato Bantug Jr., walay kalambigitan sa gihangyong subpoena ang pagtungo ni Lopez kundi nangutana lang kini bahin sa seguridad sa ikalawang pangulo, gidaghanon sa mga bisita, ug mga kagamitan nga pwedeng dalhon sa kampo sa depensa. Gipasabot ni Bantug nga usa kadto ka open-door meeting ug walay bisan kinsang senator-judge ang mitambong aron masiguro nga magpabiling patas ang dagan sa proseso.
Si Lopez ang gilaumang haharap isip testigo sa prosecution team karong Martes, Hulyo 14, kalambigit sa giingong pagbahad ni VP Sara sa kinabuhi ni Pangulong Ferdinand Marcos Jr. ug uban pang opisyal. Hinuon, andam na matud pa ang subpoena human kini mapirmahan ni Senate President Chiz Escudero, samtang daling gilikayan ni Lopez ang mga pangutana sa mga tigbalita lakip na sa Bombo Radyo diin igo lang kini nagkanayon og: “Good morning, everyone. Prepare for Typhoon Inday.”