Gipahibalo sa Philippine Navy nga lig-on ug disiplinado ang mga sundalo sa West Philippine Sea bisan sa kasamtangang tensyon sa Pilipinas ug China.
Sumala ni Navy spokesperson Rear Admiral Roy Vincent Trinidad, nagpabiling lig-on ug taas ang morale sa tropa gumikan nasayud sila sa ilang mandato ug sa tinuod nga kahimtang sa kadagatan.
Gidugang pa niya nga gumikan literal nga naa sa frontline ang mga sundalo, mas lawom ang ilang pagsabot sa isyu.
Matud pa ni Trinidad, bisan sa kasamok sa politika, nagpahiyom na lang ang mga tropa ug wala nila kini gitugotan nga makaapekto sa ilang operasyon.
Gipasiugda usab ni Trinidad, nga dili ang isig-Pilipino ang kaaway, kondili ang mga langyaw nga nanghilabot sa teritoryo sa nasud.
Nagpasidaan siya nga ang bisan kinsa nga magpakaylap og sayop nga impormasyon klaro nga nagpaluyo sa interes sa kaaway o sa Chinese Communist Party.
Ang maong pahayag gisunod sa bangi tali sa Chinese Embassy ug PCG spokesperson Commodore Jay Tarriela, ug sa pagpasa sa Senado sa resolusyon nga nagkondena sa mga insulto sa Beijing batok sa mga opisyal sa Pilipinas.
Samtang nagpabilin ang tensyon, padayon ang modernisasyon sa Navy ug ang mga patrol sa disputed waters.