Nagpagawas og bag-ong mga alegasyon ang pipila ka kanhi bodyguard ni kanhi Ako Bicol Party-list Representative Zaldy Co, diin ilang ginganlan ang ubang opisyal sa gobyerno ug personalidad sa media nga giingong nakadawat og kuwarta gikan sa kanhi mambabalaod.
Sa press conference niadtong Hunyo 16, gipaila ni abogado Atty. Levi Baligod ang upat ka bag-ong testigo nga mosuporta sa maong mga alegasyon.
Usa sa mga testigo miingon nga nakaapil siya sa paghatod og mga maleta nga giingong adunay kuwarta para kang kanhi House Speaker Martin Romualdez ug Senator Erwin Tulfo.
Gilambigit usab sa giingong “bag-men” ni Co si Commission on Elections (COMELEC) Chairperson George Garcia, nga nakadawat matud pa og kuwarta, apan hugot kining gipanghimakak ni Garcia ug gitawag nga walay kamatuoran ang alegasyon.
Aduna usab usa ka kanhi aide nga mibutyag nga nakahatod sila og upat ka maleta nga adunay kuwarta sa balay ni Senator Francis Escudero.
Gipakita usab sa mga testigo ang pipila ka litrato nga ilang giingong may kalabutan sa ilang mga pamahayag, lakip ang litrato nila uban nila Senator Kiko Pangilinan ug Sharon Cuneta.
Apan wala sila naghatag og dugang detalye sa koneksyon niini sa alegasyon.
Gipanghimak ni Cuneta ang maong mga pamahayag ug mitubag nga bakak lamang ang mga pasangil batok kanila.
Gipakita usab ang hulagway nga ka-uban si MMDA General Manager ug kanhing PNP Chief Nicolas Torre, nga giingong gikuha ang mga hulagway sa panahon nga gihangyo sila nga bawion ang ilang unang mga pamahayag sa Senado.
Samtang, giakusahan usab sa mga kanhi bodyguard nga adunay mga personalidad sa media nga nakadawat og kuwarta pinaagi sa mga paper bag, lakip sila TV journalist Arnold Clavio ug columnist Ramon Tulfo.