Gianunsyo ni Presidente Ferdinand Marcos Jr. ang pagpatuman sa P10 nga bawas kada litro sa presyo sa krudo alang sa mga public utility vehicle (PUV), nga adunay maximum nga 150 litro kada semana sulod sa tulo ka bulan.
Sa video message sa Presidente, sugdan ang maong programa sa National Capital Region sa sunod semana ug palapdan sa mosunod nga mga adlaw hangtod maipatuman kini sa tibuok nasud.
Tumong sa maong lakang ang pagpakunhod dili lang sa gasto sa transportasyon kundili usab ang pagpugong sa pagsaka sa presyo sa pagkaon ug uban pang mga batakang baligya.
Gipasabot usab sa Pangulo nga ipatuman ang fuel subsidy sa mga lehitimong gasolinahan nga aprubado ug ginamonitor sa Department of Energy aron masiguro nga dili kini maabuso.
Gipasiugda sa Punong Ehekutibo nga ang programa kabahin sa paningkamot sa gobyerno aron mapadayon ang maayong panginabuhi sa mga Pilipino ug maprotektahan ang ilang kaayohan.
Samtangi, nagpulong pag-usab ang UPLIFT Committee sa Malacañang Palace aron hisgutan ang pinakabag-ong kahimtang sa Middle East ug ang epekto niini sa nasud, ilabi na sa padayon nga pagsaka sa presyo sa krudo.
Isip tubag, gianunsyo sa Pangulo nga ipatuman sa Department of Transportation ang service contracting program sugod Abril 15.
Ilalom sa maong programa, bayaran ang mga operator ug driver og P40 hangtod P100 kada kilometro.
Sumala sa Pangulo, makadawat usab og dili moubos sa 20% nga diskwento ang mga commuter.
Sakup sa programa ang kapin 50,000 ka PUV, 1,000 ka operator, ug moabot sa 15 milyon ka pasahero sa tibuok nasud.
Tutokan niini ang mga ruta nga konektado sa tren ug mga pangunahing bus routes aron mapauswag ang daloy sa biyahe.
Ipahigayon ang programa sa off-peak hours ug butangan og GPS monitoring ang mga sakyanan aron masiguro ang husto ug tinuod nga serbisyo.