Nagtingkagol na karon sa selda sa kapulisan ang usa ka 43-anyos nga lalaki human niini gitigbas ang iyang kaubang inom didto sa Purok 2, Barangay Baclayon, niining lungsod niadtong Hunyo 22 sa gabii.
Base sa imbestigasyon sa Lantapan PNP, malinawon nga nag-inom ang 35-anyos nga biktima, ang suspek, ug ang ig-agaw sa biktima sulod mismo sa panimalay sa suspetsado. Apan tungod sa kahubog, misangpot sa init nga panaglalis ang ilang panag-istoryahanay hinungdan nga kalit nga mikuha og tumbling bolo sa kusina ang suspek ug gitigbas ang biktima dungan sa pagpanghulga nga patyon kini.
Tungod sa maong pagpanglingla, nakaangkon og mga samad sa tuo nga abaga ug sa tuo nga bahin sa ulo duol sa dunggan ang biktima. Dinalian kining gi-respondihan sa mga barangay tanod ug gidala pinaagi sa ambulansya sa MDRRMO ngadto sa Bukidnon Provincial Medical Center (BPMC) sa Malaybalay City. Samtang, boluntaryo usab nga mikuyog ang suspek sa mga otoridad ug kasamtangan nang giandam ang saktong kaso batok kaniya.