Misaka na sa 4 ang nakalas sa pagpamusil-patay sa eskwelahan sa Tacloban City.
Ang pinakabag-ong biktima, usa ka estudyante, namatay samtang nagpaalim sa balay-tambalan
Gikumpirma sa Philippine Red Cross (PRC) ang kamatayon sa ikaupat nga biktima takna alas 7 sa gabii niadtong Lunes, Hunyo 22.
Adunay usab 22 ka estudyante gikan sa San Jose National High School nga kasamtangang gitambalan sa ospital, human malambigit sa insidente.
Khiahinumduman nga nadakpan na sa mga otoridad ang duha ka suspek sa maong pagpamusil, diin narekober sa lugar sa insidente ang kapin sa 40 ka basiyo sa bala, lakip ang usa ka 9mm Glock pistol ug .38 caliber revolver nga parehong nakarehistro sa mga paryente sa suspetsado.
Isip kabahin sa mga lakang aron masiguro ang kaluwasan sa mga estudyante ug kawani, padayon nga suspensiyon sa mga klase sa San Jose National High School, San Jose Central School ug Manlurip Elementary School.
Naghatag usab dayon og medikal nga tabang ug psychosocial support ang Department of Education ngadto sa mga naapektuhang estudyante ug magtutudlo.
Samtang nagpadayon ang lawom nga imbestigasyon sa Tacloban City Police Office, gihangyo ang publiko nga likayan ang pagpakaylap og dili beripikadong impormasyon aron dili madugangan ang kahadlok ug kabalaka sa komunidad.
Ang maong insidente nakapukaw pag-usab sa diskusyon kabahin sa seguridad sa mga eskwelahan ug sa pagpatuman sa Juvenile Justice and Welfare Act, samtang daghan ang nanawagan sa mas hugot nga mga lakang aron mapugngan ang pagsulod sa mga armas sulod sa mga institusyong pang-edukasyon.