Gipasiugda ni Pangulong Ferdinand Marcos Jr. ang kahinungdanon sa lig-on nga panagtinabangay tali sa nasyonal ug lokal nga panggamhanan aron mas epektibong mahatud ang serbisyo ngadto sa katawhang Pilipino.
Sumala pa sa Pangulo, dili igo ang mga programa sa national government kung dili kini suportahan ug paningkamotan sa mga lokal nga opisyal lakip na ang mga mayor, board members ug barangay chairman.
Matud sa Presidente, nga kung dili molihok ug maningkamot ang local government units, walay mabati nga kausaban ang katawhan.
Dugang pa niini, gipadayag sa Presidente nga dili usab kaya sa national government nga matuman ang tanang proyekto kung walay kooperasyon gikan sa mga lokal nga panggamhanan.
Lakip usab sa pamahayag niini nga ang kalampusan sa mga programa sa gobyerno nag-agad sa panaghiusa ug dedikasyon sa tanang lebel sa panggamhanan.
Sa pagkakaron, nagpadayon ang panawagan sa administrasyon alang sa mas hugot nga koordinasyon ug panaghiusa tali sa national ug local government units aron mas mapalig-on ang paghatag og serbisyo publiko sa tibuok nasud.