Walay natala nga untoward incident ang kapulisan sa Northern Mindanao sa unang tulo ka adlaw sa pagpatuman sa Ligtas Undas 2026, base sa monitoring reports gikan sa mga police provincial ug city offices.
Matud ni PMAJ. Joann G. Navarro, tigpamaba sa Police Regional Office 10, nagsugod ang pagpakatap sa mga personnel niadtong Oktubre 30 ug gipadayon atol sa pagsaulog sa All Saints’ Day niadtong Nobyembre 1.
Gipasabot niini nga hangtod sa ilang pinakabag-ong monitoring, nagpabiling malinawon ang kahimtang sa mga lugar nga gibantayan sa kapulisan.
Sumala sa opisyal, gibana-banaang mikabat na sa kapin 293,000 ka tawo ang mibisita sa mga sementeryo sa Northern Mindanao atol sa pagsaulog sa Undas 2026.
Dugang pa niini, wala usab silay natala nga reklamo o blotter report gikan sa mga nabiktima sa bisan unsang matang sa krimen, samtang nagpabiling malinawon ug hapsay ang pagpatuman sa Ligtas Undas 2026.
Gikabutyag usab ni PCOL. Ariel Philip I. Pontillas, Officer-In-Charge sa Malaybalay City Police Station nga wala silay natala nga dagkong insidente kalabot sa peace and order ug public safety atol sa pagsaulog sa All Saints’ Day ug All Souls’ Day sa dakbayan sa Malaybalay.
Matud niini, adunay natala nga vehicular accident niadtong miaging adlaw apan gamay ra kini ug dali rang nasulbad sa mga hingtungdang partido.
Dugang pa niini, wala usab silay natala nga bisan unsa sa walo ka focus crimes o index crimes atol sa ilang monitoring sa Ligtas Undas 2026.
Samtang gipaambit usab ni Atty. Heinz G. Villanueva, City Administrator sa Valencia, nga wala silay natala nga dagkong insidente atol sa pagsaulog sa Undas sa dakbayan.
Matud niini, adunay usa ka tawo nga nadakpan human makuhaan og marijuana sa Old Cemetery nga giproseso na sa kapulisan ug gibalhog na sa prisohan