Gikumpirma ni National Bureau of Investigation (NBI) Director Atty. Melvin Matibag nga ang sunod-sunod nga putok sa armas nga nadungog sulod sa Senado naggikan sa Office of the Sergeant-at-Arms (OSAA). Sa usa ka press briefing sa Malacañang, gibutyag ni Matibag nga base sa ilang impormasyon, si Director Mao Aplasca ang unang nagpaputok sa iyang armas. Tungod niini, gipaubos na karon sa imbestigasyon sa Pasay Police ug sa Criminal Investigation and Detection Group (CIDG) si OSAA Chief Mao Aplasca kalabot sa maong insidente. Matod ni Philippine National Police (PNP) Chief Police General Jose Melencio Nartatez Jr., padayon pa nilang ginasuta ang bersyon ni Aplasca kon ngano nga nagpaputok kini dayon og baril base sa dagan sa mga pangyayari, ug gipasalig niya nga ipagawas dayon ang resulta sa imbestigasyon sa labing daling panahon.
Dugang pa niini, hugot nga gihimakak ni General Nartatez ang mga taho nga aduna’y “areglo” o proteksyon nga mahitabo tali sa mga miyembro sa Philippine Military Academy (PMA) alang kang Senador Ronald “Bato” dela Rosa. Kini human nanggawas ang mga report nga manag-mista o manag-uban sa PMA Class of 1986 sila si Dela Rosa ug Aplasca. Isip usa usab ka gradwado sa PMA, gipasiatab ni General Nartatez nga dili babag ang bisan unsang samahan sa pagpagawas sa kamatuoran ug nanindigan siya nga isip usa ka imbestigador, walay bisan kinsa nga tugotan nga mobabag aron masiguro nga mipatigbabaw ang hustisya. Sa pagkakaron, wala pa ma-validate sa PNP ug NBI ang mga taho kon tinuod ba nga nakagawas na sa nasud ang senador.